நிரம்பிய வெற்றிடம்

கொடுமைகளைத் தூண்டிவிட்டு 
சாட்சியாகவும் இருந்துகொண்டு
ஒன்றுமறியாதவையாய் ஓடுகிறது 
கடிகாரம் 


அத்தனையும் நினைவுப் படுத்தி 
கணக்குத் தீர்க்கா வெற்றுத் தாளாய்
கிழிந்து கிழிந்து போகிறது 
நாட்காட்டி 


கழிப்பதற்காகவே தின்னத் தேடியலையும்
தவிர்க்கவியலா சடங்கு தவிர்த்து 
திட்டமிட முயலுகையில் இருளுக்குள்ளும் 
அதையும் வசதியாக்கி திட்டமிட முயலுகையில் 
வெளிச்சத்திற்குள்ளும்
பயனற்றே புரளுகிறது 
உலக உருண்டை 


தலைகீழாய் புரண்டாலும்  
ஈர்த்த்துக் கொள்ளும் புவிவிசையாய் 
தொடர்ந்துகொண்டே இருக்கிறது 
அவலம் 


குறிக்கவேன்டியதைத் தவிர 
அத்தனையும் குறித்து நிரப்பி 
தற்குறிகளால் குதறிக் கிடக்கிறது 
வரலாறு 


சொல்லிக் கொண்டேயிருக்கும் கும்பலும் 
கேட்டுக் கொண்டேயிருக்கும் கூட்டமும்
கலைந்தமைந்து சுழலுகிறது
எல்லைசேரா சக்கரமாய் 


காலக் கழிவுகளைச் சுமக்கும் மானுடக் கூட்டம் 
அதுவே சுகமென்று ஒரே இடத்தில் 
எண்ணெய்சாத்தும் கற்களாய்