விடுபடுதல்

முகம் தெறிக்க ஓடுகிறதென்
பாதச் சுவடுகளையாவது அடைந்துவிடத் துடிக்கின்றன
நான் துரத்தும் அடையாளங்கள்

அதிவேக ஓட்டத்தில் வெளியேற்றப்பட்ட
மூச்சுக் காற்றோடு
சில அடையாளங்கள் பறந்துவிட்டன

துரத்திய களைப்பில் சில
தூரத்திலேயே ஒதுங்கிக் கொள்ள
வழியின் பக்கங்களெங்கும் நின்றால்கூட
வலிமையோடு தொட்டுவிட நிற்கின்றன மேலும் சில

கைகளிலும் கால்களிலும்
ஆடைகளிலும் அதற்குள்ளிருப்பவற்றிலும்கூட
தொற்றிய பலவும் காணாமல் போய்விட்டன
பூத்த வியர்வையில் கழுவப்பட்டு

அப்பொழுதாவது தொற்றிக் கொள்ளலாமென
களைத்துவிழும் இடம்நோக்கி
என்னை முந்தி ஓடுகின்றன
என்னையும் நானையும் அழிக்கும்
அவைகள்